မင်းဖြဲနေရင်/ပြဲနေရင်
ဆွံ့အခြင်းဘက်က ကိုယ်ဝမ်းနည်းနေမယ်
မလိုအပ်ရင် ဆွေးသွားတာတွေကိုလည်း ရှင်းထုတ်
ကိုယ်ခေါင်းလည်း ငုံ့ထားတယ်
နာကျင်လောင်မြိုက်မှု အချိုးအကွေ့ဆီ
တွားသွား သတ္တ၀ါတွေလို တိုးဝင်လို့ သွားလိုက်
ငိုသံ အဆုံးထိ အက်ကွဲပါးလွှာနေခိုက်
မနေ့ကလည်း နေဟာ ၀င်သွားတယ်
ဒီနေ့နဲ့ မနက်ဖန်လည်း နေဟာ ၀င်သွားမယ်
တကယ်ဆို တကယ် ဟုတ်တယ် ဟုတ်
ကိုယ့်ပေါက်ပြဲထားတဲ့ ဘက်ကိုလည်း ပြုပြင်ဖာထေးထားချင်တယ်
လိုနေရင် အဆုံးမရှိတော့ဘူး လိုတယ် ဟုတ်
စိတ်တောက်စားမှု ဖရိုဖရဲ ဖြစ်စဉ်တွေ
ထိ-ရှ-ပွန်း-ပဲ့ အပျက်အယွင်းများ
ကစဥ့်ကလျား ပြေးလွှားနေရတဲ့ နှစ်သစ်
မပြေပြစ်တဲ့ ရာသီမှာ မလိုတဲ့ ပန်းတွေ ဖြိုင်ဖြိုင်ပွင့်လို့
လိုအပ်ချက်ဟာ မိုးအဆုံး မြေအဆုံး
ရှင်ဟာလေ ရှင်ဟာ
ဟုတ်ပါတယ် တကယ့်ကို ကိုယ်ဟာ ကဗျာပါ
ဘာလုပ်ခြင်းသည် ကျန်းမားရေးကို ဆိုးရွားစွာ ထိခိုက်စေပါသည်လိုမျိုး
သတိပေးစာတန်းတော့ ထိုးမထားဘူးပေါ့
အဖျားတော့ တက်နေတာပေါ့
ဒါပေမဲ့ ကမ်းခြေကို လှိုင်းပြေးကပ်တယ်ဆိုတာဟာ ပြန်လည်ထွက်ခွာသွားဖို့ကိုပါ
ကိုယ့်နားကပ်လာတဲ့ ဒဏ်ရာဆိုတာကတော့
ပြန်လည်ထွက်ခွာမသွားတော့ဘဲ တွယ်ကပ်နေတာပေါ့
တကယ်တော့ တကယ်ဆိုရင်
ပုံပိခဲ့တဲ့ လူ့အဖြစ်အပျက်
သုံးပြီးသား စွန့်ပစ်ထားတဲ့ တစ်သျှူး စက္ကူစလောက်တော့ မလိုချင်ဘူးပေါ့ကွာ
မင်းလည်း ထိခိုက်စေမယ်ဆိုရင် ငြင်းဆန်မယ် ဟုတ်
မချိုတဲ့ အခါးတွေ
မင်းမသုံးတဲ့ အကောင်းစား အဆိပ်တွေ
သေချာစွန့်ပစ်ပါ ဟုတ်
ပြောနေတာက ဘာတွေ ဖြစ်သွားသလဲဆိုတာပေါ့ကွာ
ဘာတွေ ဖြစ်သွားသလဲဆိုတော့
အနာမကျက်ဘူးဆိုပါတော့
ရှင်က အဲဒါပဲ သတ္တိမရှိဘူး
ဘာလို့ ကျွန်မခေါင်းထဲ ပြေးပြေးဝင်လာတာလဲ
ရှင်နဲ့ ကျွန်မ က အ ရ င် လို အ ခြေ မျိုး မ ဟု တ်ေ တာ့ ဘူး သိ လား
သံယောဇဉ်နဲ့ ချုပ်နှောင်ထားတဲ့ စာချုပ်တွေ
နားလည်မှု ………..နဲ့ ……ယိုင်သွားလား
ပြောပါ
မင်းဆက်ပြောစရာ ရှိရင် ဆက်လက်ပြောပါ
ဖတ်နေသူကိုသာ တည့်တည့်ကြည့်ပြီးပြောပါတော့
ကိုယ့်ကဗျာ ဒီမှာ အဆုံးသတ်သွားခဲ့ပါပြီ။
သည်ကဗျာနှင့် ပတ်သက်၍ လိုအပ်ပါက သင်အစားထိုး အသုံးပြုနိုင်သော အရန်သင့် စကားလုံးများ
၁။ ဘ၀၊ လွတ်လပ်မှု၊ စိတ်၊ ရှင်သန်ခြင်း၊ သေဆုံးမှု၊ အနာ၊ ပျောက်ကွယ်စက်၊ မသမာမှု၊ ဆိုးဆေး၊ လိင်၊ ညဆိုး၊ အိပ်မက်၊ အရိုင်းဆန်မှု။
၂။ အချစ်၊ နွေးထွေးမှု၊ အနည်ထိုင်ခြင်း၊ အမှုန်အမွှား၊ ပြဿနာ၊ သတိရမှု၊ ခုံ၊ လက်ဆောင်၊ ပန်း၊ ခွဲခွာမှု၊ ရင်ပြင်၊ နံရံ၊ အဖုအထစ်။
၃။ ငွေကြေး၊ ကြွယ်ဝချို့တဲ့မှု့၊ အခက်အခဲ၊ လမ်း၊ မှတ်တိုင်၊ စား-၀တ်-နေရေး-ကျန်းမာရေး၊ အကောက်ခွန်၊ လူမှုရေး၊ သင်တန်း။
၎။ စစ်၊ အနိဋ္ဌာရုံ၊ သွေးစက်၊ မိသားစုပြိုကွဲခြင်း၊ တော-တောင်၊ အကြမ်းဖက်မှု၊ အာဏာ၊ အကွေ့၊ စနစ်ဆိုး၊ ငိုသံ၊ တိတ်ဆိတ်မှု။ ဒေသ။
၅။ အခြား သင့်စိတ်ကြိုက် အသုံးပြုလိုသော အက္ခရာ၊ စကားလုံးများ၊ ၀ါကျများ၊ ဘာသာစကားများ။
ဆူးရင့် စိုးမင်းအောင်
2. 1. 2011 နံနက်ခင်းကြယ်စင်စု ကဗျာပြပွဲမှ ရွှေတိဂုံကုန်းတော်သို့၊ ထိုမှ အပြန် ဆူးရင့် စိုးမင်းအောင်
လူ့အဖွဲ့အစည်း ကမ္ဘာ မသေချာသော နေ့စွဲများစသဖြင့် စိတ်အခြေအနေ ပြိုပျက် ပူးပေါင်း ရေးသားခဲ့သည်။ ။
No comments:
Post a Comment